你問我答

1. 我想申請求助,有什麼資料需要提交? 另外,細葉榕如何保障我的個人資料不會外洩?

為保障申請者,所有申請資料都唔會存放喺香港。申請人只需備妥下列證明文件,並將電子檔案電郵至下列電郵地址:
info.banyantreeaid@pm.me

1 申請代表個人資料(僅接受護照影印本)
2 在囚者身份證明(如申請代表並非在囚者)
3 關係證明(如申請代表並非在囚者)
4 申請代表三個月內的住址證明
5 一位重要聯絡人的資料(僅接受Telegram聯絡方式)
6 監禁刑期證明(certification of trial)
7 相關新聞報道(接受PDF電子列印檔案)

為保障私隱同個人安全,建議使用Protonmail同埋VPN。

申請單位亦可提供其他相關經濟援助資格證明予本基金參考。

申請詳情可以參考我哋嘅網頁:banyanaid.org 或者直接tg 同我哋聯絡 tg: @banyantreeaid

2. 目前基金只係提供生活上嘅緊急援助俾有需要人士,日後會否擴大支援範圍到律師費或醫療費上?

我哋絕對樂意同渴望更完整咁支援各位在囚人士,但目前基金僅有大約8萬元月捐額,限制咗可以分配嘅範疇。

目前我哋對在囚者嘅經濟支援以實際刑期為準,非無限期發放。支援金額係每月港幣3000至9000元等值貨幣,視乎基金獲得捐款而會有所調節。

3. 生活喺國安法下嘅香港,如果我想捐款,點樣可以確保捐款過程係安全?

咁就要首先介紹下我哋嘅月捐計劃喇。

在囚支援係需要大家持續支持,但係,我哋明白大家都有各自嘅重擔,因此我哋嘅初衷係希望大家可以喺一個合理無壓力嘅情況下 (可以係每月50元)支援在囚者。所以,我哋最希望喺有中期/長期可以持續支援嘅月捐人士。
(亦都避免咗基金囤積資源嘅情況)

💡我哋留意到有啲朋友可能月捐咗一兩個月就暫停捐款,後來問返原因先知,佢哋誤會咗以為我哋已經籌夠錢🥺🥺🥺

呢個係一個好大嘅誤會啊,我哋每次出post都係根據嗰個月嘅支援額嚟向大家籌錢。所以,我哋之後就算話到目標,都只係嗰個月嘅目標咋,如果大家之後又暫停月捐的話,我哋下個月又會為基金嘅餘額惆悵😢

所以,回應返頭先所講嘅,我哋最希望就係可以有一啲中長期嘅月捐支持者。(以暴動罪刑期嚟計一般 4 - 5年)

暫時最安全嘅月捐方法係用Stripe平台,佢會將我哋基金名隱藏,唔會喺你銀行紀錄上顯示出嚟,只會顯示捐咗俾慈善機構*。

網頁上嘅月捐連結,就係Stripe嘅直接捐款連結。透過Stripe 平台,捐款者可以使用信用咭 (Visa/ Master/ AE) 進行捐款,非常簡單。

*實際類別名稱根據唔同銀行將有差異,但都唔會直接顯示我哋基金名。

4. 我想提供一筆過捐款,可以有其他途徑嗎?

多謝支持! 你可以透過以下三種方式作單次捐款:

1. 銀行過數 WISE UK(基於安全理由,強烈不建議使用香港戶口過數)

2. Paypal UK

3. Stripe 單次捐款連結 (比較費時,但最能保障你的安全)

如果想提供一筆過捐款,請電郵或TG聯絡我哋,並提供捐款銀碼及所選擇之捐款方式, 我哋會將捐款連結盡快提供俾你。

5. 如何確保我嘅捐款用得其所?

我哋實行「第三方監督財政制度」,由第三方維權人士監督基金財務,不但確保資金用於正途,更消除一般基金行政開銷過高嘅弊病,致力達到「公開」同「廉正」。

現時,我哋每個月都會將詳細嘅財務報告交比義務財政監察委員 (下稱: 義務財委)審批,另外,每三個月亦會公布一份詳細嘅工作報告,確保基金係受到公眾監察。

「細葉榕」致力邀請唔同嘅人權組織擔任義務財委,負責監察基金嘅財務狀況,一旦出現唔合理嘅財務狀況,義務財委將對公眾公開我哋完整嘅財務報告,公眾可由此定奪係咪繼續信任我哋。

目前義務財委包括:
鄭文傑先生 (港僑協會創辦人,個人義助)

張嘉莉小姐 (藝術策展人,前灣仔區議員)
澳港聯(澳洲人道組織)

自籌組起,基金便一直邀請各地人權組織同人士協助監督基金財務,未來亦會繼續邀請更多理念相同嘅組織同人士擔任義務財委。