1. 我想申請求助,需要提交甚麼資料? 另外,細葉榕如何保障我的個人資料不會外洩?

為保障申請者,所有申請資料都唔會存放喺香港。申請人只需備妥下列證明文件,並將電子檔案電郵至下列電郵地址:
info.banyantreeaid@pm.me

 

  1. 申請人個人資料(僅接受身份證或護照副本)

  2. 在囚者身份證明(如非本人申請)

  3. 關係證明(如非本人申請)

  4. 申請人三個月内的住址證明

  5. 一位重要聯絡人的Telegram username

  6. 監禁刑期證明 (Certification of Trial) *由懲教署發出的監禁證明

  7. 相關新聞報道PDF檔案


為保障私隱同個人安全,建議使用Protonmail同埋VPN。

申請單位亦可提供其他相關經濟援助資格證明予本基金參考。

申請詳情可以參考我哋嘅網頁:www.banyanaid.org/application-info 或

直接以Telegram同我哋聯絡: @banyantreeaid

 

2. 目前基金只係提供生活上嘅緊急援助俾有需要人士,日後會否擴大支援範圍到律師費或醫療費上?

我哋絕對樂意同渴望更全面咁支援各位在囚人士,但目前基金僅有大約10萬元月捐額,限制咗可以分配嘅範疇。

目前我哋對在囚者嘅經濟支援期以實際刑期為準,非無限期發放。支援金額係每月港幣3000至9000元等值貨幣,視乎基金獲得捐款而有所調節。

 

3. 生活喺國安法下嘅香港,點樣可以確保捐款過程係安全?

首先要介紹吓我哋嘅月捐計劃。

在囚支援係需要大家持續支持,但係,我哋明白大家都有各自嘅重擔,因此我哋嘅初衷係希望大家可以喺一個合理無壓力嘅情況下 (可以係每月50元)支援在囚者,亦都希望避免基金囤積資源。所以,我哋最希望喺有長期可以持續支援嘅月捐人士。

我哋留意到有啲朋友可能月捐咗一兩個月就暫停捐款,後來問返原因先知,佢哋誤會咗以為我哋已經籌夠錢。

呢個係一個好大嘅誤會啊,我哋每次出post都係根據嗰個月嘅支援額嚟向大家籌錢。所以,我哋之後就算話到目標,都只係嗰個月嘅目標咋,如果大家之後又暫停月捐的話,我哋下個月又需要為基金嘅餘額惆悵。

所以,回應返頭先所講嘅,我哋最希望就係可以有一啲長期嘅月捐支持者。


暫時最安全嘅月捐方法係用Stripe平台,佢會將我哋基金名隱藏,唔會喺你銀行紀錄上顯示出嚟,只會顯示捐咗俾慈善機構*。

網頁上嘅月捐連結,就係Stripe嘅直接捐款連結。透過Stripe 平台,捐款者可以使用信用咭 (Visa/ Master/ AE) 捐款,非常簡單。

 

 


*實際類別名稱根據唔同銀行將有差異,但都唔會直接顯示我哋基金名。

 

4. 我可以提供一筆過捐款嗎?

多謝支持! 你可以透過以下三種方式作單次捐款:
 

1. Paypal UK

2. Stripe 單次捐款 (比較費時,但更保障你的安全)

 

3. Bitcoin 捐款
 

 

5. 如何確保我嘅捐款用得其所?

我哋實行「第三方監督財政制度」,由第三方維權人士監督基金財務,不但確保資金用於正途,更消除一般基金行政開銷過高嘅弊病,致力達到「公開」同「廉正」。

現時,我哋每個月都會將詳細嘅財務報告交比義務財政監察委員 (下稱: 義務財委)審批,另外,每三個月亦會公布一份詳細嘅工作報告,確保基金係受到公眾監察。

「細葉榕」致力邀請唔同嘅人權組織擔任義務財委,負責監察基金嘅財務狀況,一旦出現唔合理嘅財務狀況,義務財委將對公眾公開我哋完整嘅財務報告,公眾可由此定奪係咪繼續信任我哋。

目前義務財委包括:
鄭文傑先生 (港僑協會創辦人,以個人名義義務幫助)

張嘉莉小姐 (藝術策展人,前灣仔區議員)
澳港聯(澳洲人道組織)

自籌組起,基金便一直邀請各地人權組織同人士協助監督基金財務,未來亦會繼續邀請更多理念相同嘅組織同人士擔任義務財委。

 
 

6. 可唔可以介紹下你哋既成員?另外,我都想知道你哋成立細葉榕嘅原因?

我哋係嚟自海外各地嘅專業人士,包括:生物學教授、媒體工作者同埋會計師。過去兩年都有各自參與民主運動,因而結識到大家。

核心成員名單如下:
Dr. Eric Ho  (生物學教授)
Ms. Kelly Pun (媒體工作者)
Mr. Thomas Fung (會計師)

同時有感政治環境日趨嚴峻,我哋估計唔同嘅香港民主組織將會面臨被打壓甚至被取締,所以就喺海外籌備人道支援組織以備不時之需。

7. 曾經有人道支援基金被凍結戶口,請問你們有相對應的預防措施嗎?

完全明白大家嘅顧慮,呢個亦都係我哋非常關注嘅問題。港共政府為打壓人道支援工作,以懷疑洗黑錢為理由凍結一些組織及個人銀行户口,從而達到政治目的。

因此,我哋有以下相對應措施。細葉榕係一個喺英國註冊嘅基金,銀行戶口係使用WiseUK,使用海外金融機構可以避免資金因為打壓而遭到無理及無限期凍結。

另外,我哋亦都建議捐款人採用月捐嘅方式,主要目的係避免資源囤積( 減低風險 ),另一方面就係,希望可以為在囚人士提供完整而穩定嘅經濟支援。

 

8. 你們目前有遇到什麼困難嗎?

目前面對兩個比較迫切嘅難題:

1)基金缺乏知名度

目前社交媒體的follower人數偏低,受演算影響下,我哋嘅post接觸到的目標用戶較少,亦因為咁細葉榕冇辦法做到以往同類基金嘅支援規模。,

2)缺乏人手

由於成員人數有限亟待援手,各方面都需要同路人幫忙,包括但不限於:日常行政助理、公關宣傳、會計師同埋願意陪同我們開荒,對於人權運動發展有遠見,又樂意振興香港族群嘅你!

 

9. 細葉榕成立咗一段時間,你哋對於組織未來發展有咩長遠目標?

基金首要目標係支援在囚及更新人士,往後我們亦會致力喺各項公益事務上建立更強大嘅支援配套,範圍包括但不限於:教育、企業初創同科研發展。

嚟緊嘅計畫包括:
1.「在囚支援指南持續更新計畫」
2.「助學金及獎學金計畫」
3.「推動海外香港文化教育與研究主流化」

我哋冀望透過教育培養人才、團結人才發展科企、聯合科企引領民族圖強,並回饋教育同人道支援,有如故鄉嘅榕樹群咁生生不息。希望可以為世界帶來多一點光明,照亮後來者前路,馭風駕浪,航向新曦。